六月二十二日

兩歲四個月大喇，夠竟有冇高咗同重咗呢？

體重：???

身高：???

搞乜野呢？唔係大家部電腦有問題，而係阿ba喺呢兩年幾嚟第一次唔記得同蓁蓁做記錄，SO BAD…… 下個月補番喇！

六月二十一日

今日係父親節，一早起身蓁蓁就同我講"父親節快樂" (早幾日教佢時仲係成日講母親節快樂架，俾佢激死)，真開心。約咗爺爺出嚟飲餐茶，原來其他人都得喎，所以今日大姑姐、大伯、大伯娘、細姑姐、表姐同嫲嫲都有一齊出嚟。點解冇數阿mi嘅？因為阿mi今日有秘密任務，等陣再同大家交代。一家人最緊要係整整齊齊，所以今日雖然只係好普通飲下茶，但感覺已經好好了。短聚兩三個鐘後就返咗屋企等阿mi然後再出去食飯，而父親節就係咁就過咗。

而阿mi今日有乜秘密任務呢？就係要解決喺我屋企做咗一年八個月嘅印傭。據阿mi嘅報告，姐姐完全好平靜，好似一早知道今日會俾人炒咁，所以阿mi都好快搞掂，仲有時間同May姨去行街街添。

好耐冇見爺爺嫲嫲喇！

咁梗係要同阿ba影張相喇！

呢D係蓁蓁嘅傑作，都唔差喎！

六月十四日

之前一直都想買一張新枱俾蓁蓁用嚟玩玩具/睇畫/寫字/食飯，但睇咗好耐都唔啱。早排喺IKEA見到一張連兩張櫈，大小高度都非常合適，於是今早就過去買回家，順路於德福食個午飯。而喺IKEA入面行行吓之際，突然俾蓁蓁見到一隻我地都揾咗好耐嘅玩具 – Polar Bear！蓁蓁愛bear bear就係人都知，但其實佢最鍾意係Polar Bear，所以俾佢發現後又點會肯放手，就係咁Polar Bear就跟咗蓁蓁返屋企，而蓁蓁而家每晚瞓覺都要攬著一陣呀！

就係呢隻Polar Bear喇，其實佢都幾大隻架！

而呢張就係新枱喇，蓁蓁仲開心到同Polar Bear一齊睇書添！

Bear bear，我真係好鍾意你架！

六月九日

今日係星期二，阿mi要返工，不過阿ba就請咗假(大假多得滯)，同蓁蓁喺屋企玩。雖然冇去街街，但同蓁蓁一齊已經好開心，因為蓁蓁成日同我講"生日快樂"，一時又講"父親節快樂" (預祝)，仲唱Happy Birthday to You, Happy Birthday to You, Happy Birthday to You, Happy Birthday to You! 嘩勁！

不過夜晚都有出去食餐飯，原先去九龍城食日本放題，點知打去訂位時話蓁蓁要收小童價，雖然係阿mi請啫，但係我都係覺得唔抵，所以轉咗去九龍灣食，近近地，其實阿ba對食真係冇乜要求，只要一家人開開心心，食乜又有嘜所謂呢！

最後返到屋企阿mi仲送埋生日禮物俾阿ba添 (阿mi仲扮野話冇時間去買呀!)，阿ba梗係唔信喇，anyway thanks Mimi…  I Love You & chunchun!

蓁蓁都好忙，出嚟同阿ba賀壽，都仲要開機做野……

阿ba今日嘅生日大餐，好好味！

阿ba，見你生日，送你一個香吻喇！

阿ba，點解你個生日蛋糕會喺我頭頂架！

呢份就係我今年嘅生日禮物喇，超啱用！

六月七日

今日又相約咗一班朋友仔(蓁蓁 D friend)出嚟玩，今次去嘅目的地係天水圍嘅綠田園燒烤樂園，據其他媽咪講呢度地方夠大同有幾多嘢玩，燒烤食物水準亦唔錯，所以去呢個場囉。

今日嚟嘅朋友仔唔多，不過都OK喇，少有少玩啫，我地先玩咗然後再燒野食，走嘅時候已經十點鐘喇，又係盡慶嘅一天。

你睇Keith幾型！ 好在蓁蓁都唔差…

仲有欣欣豬，同埋一一

去到先去參觀動物，有牛、有羊，仲有……

可能呀牛大哥好餓，食野時大力咗，攪到蓁蓁驚驚地!

呢張相阿囡笑得好甜，但阿爸就……幾駭人…

玩完陸上，再玩水上 -- 踩水上單車加餵魚魚

點解Keith會突然間大喊？ 原來俾魚魚駭親！

兩個爸爸一齊踩，都唔算好辛苦啫

去到郊外一定玩嘅玩具 - 吹泡泡！

開餐lu…… 88！

五月二十八日

答應咗蓁蓁今個星期帶佢去畢沙沙，但星期六一直落雨，就諗住星期日去，點知星期日阿mi又要返工，咁就等阿mi放工然後一齊出發。大約三點鐘出發，成朝都冇雨，點知架車一出停車場就開始落，但係都出咗嚟，咁就照去我地今日嘅目的地-清水灣二灘。蓁蓁就利用入去嘅時間嚟一個小睡，但可惜雨越落越大，去到沙灘停車場都仲未停，但我地見蓁蓁未醒，於是就等佢醒咗再睇吓會唔會停雨。大約四點三蓁蓁終於醒咗，雨都細咗但就未停，我地問過蓁蓁意見後就決定落沙灘玩一陣。

原來畢沙沙真係好好玩，落雨都冇有怕，但係我地兩老就驚凍親佢，所以都係玩咗一粒鐘就閃，下次再玩過喇，不過蓁蓁已經超開心了。

I’m ready to go, YEAH~~~

蓁蓁真係超愛畢沙沙，一個人玩都咁開心   (見唔見到隔離有個宮女為佢摭風擋雨架)

咁大雨兩父女仲走落海做乜啫?

五月二十二日

兩歲三個月大，有冇高咗同重咗呢？

體重：14.6Kg (32.12磅)  突破32磅喇！

身高：91cm  今個月就冇高喎！

阿mi話好耐冇買過玩具俾蓁蓁，所以前一日就去咗海港城食飯同埋買禮物，蓁蓁超開心呀！

今年阿ba實在太懶，所以攪到咁遲先完成。今年比較簡單，我地選擇咗香港兒童癌病基金作為受惠機構，希望蓁蓁第時大個囡可以一路繼續呢種助人為快樂之本嘅道理喇！

今年母親節安排比較簡單，前一個星期已經同外母一家先行慶祝，咁到咗正日就可以輕鬆一點吧。母親節當日我家全部人都能夠一齊同阿媽飲個茶，簡簡單單圍埋一家人食餐飯感覺已經很好，阿媽能夠同蓁蓁、堂家姐同埋表姐三粒孫玩吓食吓都不知幾開心。不過歡樂嘅時光過得特別快，大家食飽後又要散band喇，同嫲嫲說再見後就輪到我地自己一家三口慶祝喇，YEAH~~~

阿爸見只是大約三點多，再加上過咗海，不如又入去赤柱行吓喇，於是便開車立刻出發，沿途見有好多車出嚟，心諗應該可以揾到位泊車，但入到去最終都泊唔低架車，於是就再去吓淺水灣同深水灣碰碰運氣，但最後都係冇位。突然阿爸話去數碼港行吓，因為有個大草地可以俾蓁蓁走吓，最後大約四點多入到去。好耐冇嚟過嘅數碼港一樣咁靜，不過都好過去D大商場同人迫。落車後就向大草地進發，但見到嗰草地又唔係好想俾蓁蓁走喎，因為有好多人喺度放狗，地下可能有好多地雷，於是影吓相就返入商場。行行吓見到有間大型玩具店，於是帶蓁蓁入去睇吓，而一件小插曲亦在此時發生。

話說舖內有一間小屋仔俾小朋友玩，蓁蓁見到梗係想玩喇，但當時屋內有兩姊妹正在玩，於是我就叫蓁蓁等一陣再嚟玩，但蓁蓁極度想玩，死都唔肯走，咁就同佢等一陣喇，等咗約五分鐘兩姊妹仍然未玩完，咁我又同蓁蓁講轉頭再玩，就在此時兩姊妹嘅父母同佢地講"你地慢慢玩喇，我地都冇地方去！" 我聽到後真係幾嬲，香港人俾D公德心喇，睇著有小朋友等緊玩，玩多陣就俾其他人玩，真係想玩過世咩？咁我都冇計唯有抱走蓁蓁一陣再返轉頭，此時蓁蓁梗係扭計加喊喊喇！

幾個字後返轉頭，yeah，冇人，蓁蓁可以玩喇，蓁蓁第一時間入咗屋入面好開心咁玩，約兩分鐘後兩個鬼仔(約七歲及四歲)由鬼佬同賓妹帶嚟入咗屋一齊玩，個細鬼仔超百厭，我己經小心睇住蓁蓁，但意外就在此時發生，個細鬼仔整親蓁蓁仲要損咗，蓁蓁即時大喊，個死鬼佬睇到理都唔理，仲同個大仔走咗去，反而個賓妹知道細鬼仔整親人仲識捉住佢叫佢同蓁蓁say sorry，咁最後我地梗係就咁算喇，不過呢D咁嘅死鬼佬真係不知所謂，完全冇家教可言！

乜mood都冇晒，咁就諗住返屋企喇，不過最後都去埋百X買埋晚餐同埋蓁蓁最鍾意嘅"健康"(益力多)先返屋企，都算過咗一日難忘嘅母親節！

*註：今年蓁蓁送咗一個花花鎖匙扣同埋暖水壺俾阿mi呀！

檢視完整相簿

呢一篇部落格如果要寫得詳細，真係可以寫幾頁紙都可以，不過我自己都冇咁好耐性，所以都係一切從簡喇。

人物介紹：

湯先生 - 呢位梗係我呢篇部落格嘅主角新郎哥喇，做人性恪低調，不過為人十分玩得。自中一起識到而家，大大話話超過二十年，同佢嘅友情真係冇嘢好講，三個字就可以形容，好兄弟！

蔡小姐 - 湯先生嘅女朋友，咁梗係新娘子喇，其實都只係佢係湯生嘅女友先識，不過亦識咗成十年(其實唔係好記得)，做人直腸直肚，又玩得又飲得，性格爽朗，做朋友真係一流！

中學同學 – Freddy, Ricky, Joe, Angel, Irene, Lawrence, 呢班都係識咗超過二十年嘅老死，一呼百應的支持及參與今次嘅派對。

蔡小姐老死 – Money, Sandy, Joey, 呢三位靚女我就唔係好識喇，只係知道佢地係蔡小姐嘅best friend，咁有派對梗要叫埋佢地喇。

派對前傳篇：

其實認識湯先生為人嘅朋友都知道，佢係唔想結婚(因為佢覺得一紙婚書不能代表任何野)，同埋佢絕對唔鍾意擺酒(因為佢覺得結婚係兩個人之間嘅事，冇需要攪咁多嘢俾人睇)，而蔡小姐同佢一齊咁多年亦已經有咗共識，所以所有朋友都認為佢地今世都應該唔會結婚架喇。不過今年年頭一次午餐飯局中湯生話會考慮結婚(原因大家都知，總知唔係哀野喇！)，咁我都係聽下先喇，後來蔡小姐不斷問我有關註冊嘅問題，在我不斷追問下先知原來佢地己經定咗四月十五日註冊結婚，但冇諗住通知任何人，只係得我一個知道，而蔡小姐亦要求我保守呢個秘密，咁作為佢地嘅好朋友我一定做得到。

雖然我覺得呢個好兄弟結婚應該俾多D人知，等多D人一齊分享呢份喜悅，而我亦經蔡小姐多次要求湯生通知各朋友，等好朋友們可以一齊去觀禮，但最終湯生仍然選擇低調，不讓朋友們知道，咁我唯有尊重佢地嘅決定，在心裏默默祝福佢倆〝新婚快樂、永結同心〞喇！日子一日一日咁過，好快就咁過咗四月十五日，我本以為事情已經結束，但原來係另一件事嘅開始……

派對籌備篇：

大約四月十八/九日，Freddy突然於晚上通知我湯生/蔡小姐已經結咗婚，雖然我係知道，但仍然要扮儍，仲要問佢點知，原來蔡小姐(湯太)將一D結婚相放咗上Facebook，所以朋友們便立刻知道，我亦立刻寫下祝福字句，好似放下心頭大石，終於可以將秘密公開了。又過咗幾日，突然Angel話想幫一對新人搞個小派對，當食餐飯都好喇，但我知道低調的湯生未必鍾意，所以先同湯太聯絡，取得共識後最後定於五月九日進行，而我就作為今次派對嘅統籌。

派對籌委會成員主要有Angel同埋Freddy，再加上Joe嘅幫忙，令整件事都能順利進行，喺度真係要多謝各位嘅幫忙，能夠令到湯生湯太最後有一個一生難忙嘅派對，作為經籌嘅我都非常開心。一開始我地就先選擇派對地點，最後得到Joe嘅幫忙，決定於佢屋企會所嘅Function Room，因為感覺會私人D同埋可以玩得盡慶D。然後大家又諗下送乜俾對新人作為新婚禮物，多諗頭嘅Angel選擇咗性感內衣用嚟玩一對新人，實際上係送咗一對情侶錶俾佢地嘅。而食物方面就得到Freddy嘅幫忙，最後選擇咗泰國菜作為到會，再搞埋結婚蛋榚、香檳、場地佈置、飲品雜項及聯絡後，傾妥Rundown後本以為一切準備好晒，但Angel話仲想搞D新意思，最後為湯太準備咗一套婚紗，作為一個小驚喜喇，不過大家都認為湯生可能會唔高興，所以著與唔著都係睇吓當日嘅情況同埋等湯太自己決定。而籌備工作亦全部完成，大家都好期待五月九日嘅來臨！

派對篇：

先講下今日出席賓客名單：Raymond, Crury and Chunchun; Freddy, Vivian and Yingying; Angel and Chin; Joe and Cherry; Irene and Frederick; Ricky and Leslie; Lawrence; Sandy; Money and Joey。派對定於晚上六點三十分開始(新人進場時間)，而其實各籌委大約六點鐘已經到達為場地進行簡單佈置，就在佈置期間我收到湯太短訊通知湯生有點唔高興，叫我地小心D玩，不過我就冇理到喇。一切準備好後，就通知一對新人入場，好在湯生見到個派對後都仲會笑，大家嘅擔心都開始慢慢消失。作為大會司儀嘅我本來都諗咗一D野想同好兄弟講作為大會嘅開場白，但我實在太緊張同埋我驚講錯嘢搞到個派對唔好玩，所以都係講咗D好例牌說話，然後就切蛋糕、開香檳同飲合巹交杯喇，此時氣氛亦慢慢高漲，在一眾好友們的大叫下一對新人亦徇眾要求熱吻超過一分鐘，唔好諗住就咁就完喎，接落嚟就到歡樂小姐送禮物嘅時間，我地先送咗套唔係好性感嘅內衣俾佢地，玩到高興嘅湯生仲著咗套女裝，咁湯太亦識趣地著咗套男裝，仲俾大家不斷咁影相，最後歡樂小姐送埋真正嘅結婚禮物後晚餐就正式開始。

但一開始食嘢就唔見咗新娘子嘅？原來湯太見湯生都冇乜嘢，同埋都想好似一般新娘咁著吓婚紗嘅滋味，去咗換婚紗。搞咗一輪之後美麗嘅新娘子終於出場，我睇得出湯太真係好開心，好enjoy呢一個moment，跟住落嚟嘅場面就好似擺酒咁，一對新人不斷咁同不同嘅朋友影相同埋大合照，總知就超開心喇。而派對亦進入尾聲，但此時湯太就向大家派發回禮之禮物(真係好似去飲咁)，最後大家飲飽食醉，收拾好場地後於九點鐘就正式結束！

派對後傳篇：

作為統籌嘅我又點會就咁俾佢完呢，梗係有下場喇！得到湯太嘅答謝，部份人(Tom, Peggy, Raymond, Freddy, Vivian, Ricky Leslie, Sandy, Money and Joey)會繼續去唱K，其實最主要係飲酒。今晚湯生真係好高興，飲咗好多酒(我識咗佢二十幾年都未見過佢一晚飲咁多)，而我呢，唔駛講梗係戥人高興越飲越多喇，最後玩到三點幾終於散band，各自歸家。

個人感想：

能夠見到好兄弟結婚梗係開心，而能夠為好兄弟安排一個難忘的小型派對仲更加開心，不過無論點都好，最緊要係你地倆個開開心心咁白頭到老喇！

靚相篇：

請按右下角〝檢視完整相簿〞睇埋其他相喇。

檢視完整相簿

四月二十二日

兩歲兩個月大，有冇高咗同重咗呢？

體重：14.4Kg (31.68磅)  突然重咗一磅有多???

身高：91cm  今個月就冇高喎！

四月二十六日

今日其實係一個好簡單嘅大食會，而且小朋友不多，只得兩個，所以其實真係不值一提，不過原來阿mi安排咗兩個小朋友為一間新開張嘅網上商店做特約小model，對於第一次演出，蓁蓁都不過不失喇，希望繼續有得做，長做長有喇！

檢視完整相簿

五月一日勞動節

今日就約咗一班舊同學去南丫島行山，出席嘅有Joey’s family, Sandy’s family, Paul’s family and my family，可惜嘅係仲有兩個家庭未能出席，如果能夠齊人就非常高興。今日天公造美，有柔和嘅陽光加上少許風，行山真係一流。大約兩點鐘大家齊集於中環港外線碼頭準備出發，嘩，可能真係長假期關係，超多人，不過都無損我地嘅雅興，繼續向南丫島進發。大約三點鐘就入到榕樹灣開始起行，真係好多人，沿路好似行緊旺角咁，不過都好開心。一路沿着大街行，咁梗係唔少得掃街喇，我意思係食嘢，食咗椰絲糖、鹹魚仔、雪榚、涼茶，最後仲食埋豆腐花就啱啱好，最可惜係食唔到串燒(因為有超多人排隊)，食飽咗就可以向洪聖爺灣進發，去到沙灘一樣咁多人，不過我地都停低等小朋友可以玩一陣。大約五點鐘就離開沙灘正式開始行山，但兩個最細嘅小朋友蓁蓁同Chloe就巳經攰到瞓咗，全程要媽媽揹着行，不過都好，等兩個媽媽可以減下肥，嘻嘻。話咁快六點多就到達索罟灣，嘩，所有食店都人山人海，都係我唔好，朋友出發時已經問我今晚是否需要訂座，但我就好定的對他們說唔需要，最後搞到一大班朋友等位等到七點幾，各位真係唔好意思，下次我會排得好D架喇。今晚嘅海鮮餐都非常豐富，八個大人加幾個細路就叫咗十個餸，碟碟都同你食晒，我地呢班人都幾食得架喎。最後我地搭咗九點幾班船出返尖沙咀/中環後就結束今日開心之旅，唔知下次又要到幾時先可以一大班又再出過嚟玩呢？

五月二日

今日大出血，因為屋企用咗十幾年(由上手業主開始計)嘅煤氣熱水爐終於壞咗，早兩日揾咗煤氣公司上嚟檢查，最後話安全性有問題要立刻停用，今日立刻去買咗嗰新嘅，嘩，要八千幾，好在朋友Joey咁啱之前又換咗同一款嘅新爐而且有一千蚊discount加一千蚊coupon(唔該晒Joey)，不過埋單都要七千幾，仲要冇熱水涼沖幾日，最後星期一下午完工，師傅仲幫我整咗之前大雨入水嘅問題(不另收費)，而家可以沖返嗰正涼喇。

五月三日

今日仲係長假期，所以又約咗蓁蓁D朋友仔出嚟聚一聚，今次嘅目的地係幾星期前去過嘅錦田，大家都係鍾意呢度有塊大草地可以俾D小朋友週圍走吓。今日真係有好多朋友仔出席架，多到我都唔係好記得，大約有十個到喇，約三點鐘大家慢慢到達，咁就俾佢地喺草地吹吓波波，又踢吓波波咁喇，下午茶完之後仲去咗跳彈床添呀，蓁蓁經過上次跳彈床之後，佢真係極之鍾意Jumping，今次冇姐姐睇住情況下佢仍然玩得超開心，我地倆老睇住亦係超開心。大約五點幾，有幾個朋友仔要走先，剩底五個家庭繼續燒埋野食先走，而此時突然間落咗一場大雨，不過都好，雨後天氣比較涼，燒住野食都爽D，燒到九點幾又要散場喇，而幾日嘅假期亦要結束，要收拾心情返工喇！

兩歲生日廸廸尼遊後，發生過咩事呢？去過邊度玩呢？不如就喺呢度同大家簡述一下喇：

三月一日

又係BB聚會呀，今次都係喺萬景峯嗰會所。今日好開心呀，因為聚會之餘仲係所有BB嘅生日會(全部都足兩歲架喇)，我地唱生日歌都唱咗十幾次，每次BB都會扮吹爉燭，真係超開心呀！

三月七日

今日其實冇乜特別，只係普通行街街，但行過一間舖頭時，蓁蓁話眼鏡好靚，於是又氹到mimi買一副俾佢，臨走時仲要玩騎馬仔，阿囡又過咗開心嘅一天。

三月二十二日

兩歲一個月大，有冇高咗同重咗呢？

體重：13.8Kg (30.36磅)  同上個月一樣重

身高：91cm  今個月又高咗1cm呀！

三月二十八、九日

今次我地一家三口同埋mimi嘅同事一齊去咗深圳東部華僑城玩咗兩日，雖然天氣唔係太好，但地方都算唔錯，風景都幾好架，不過喺食個方面就真係差咗D，下次真係要醒D出返去大梅沙附近揾食先得。(上年嘅同一時間我地一家三口去咗曼谷玩架！)

四月四日

今日係兒童節加清明節假期，我地就剪咗個靚髮然後就同婆婆食晚飯，都已經好開心喇。

四月十日

復活節假期第一日，我地約咗班舊同學拖男帶女去錦田玩咗大半日，呢度都幾啱小朋友玩，有兩片綠悠悠嘅草地可以俾小朋友盡情跑之餘，加上吹氣彈床，撈金魚，砌沙樽，塑膠畫，同埋小動物，真係玩足一日都得。而大人就可以燒烤，摘士多啤梨同埋打番幾圈，諗起都爽呀！

四月十二日

今日我地去咗拜蓁蓁嘅公公，蓁蓁已經大個囡喇，拜公公時好正經，仲好神心添！

四月十三日

今日有兩個朋友仔嚟探蓁蓁呀，咁阿囡梗係一盡地主之誼熱情地招呼喇，由天光玩到天黑，食埋飯又十點幾喇！

睇返上一篇部落格原來已經係兩個月前所寫的，真係對唔住我嘅粉絲同埋想知道蓁蓁近況嘅朋友。其實都係因為小弟懶同埋病嘅原因，所以先冇更新啫。都係自己衰多口(其實只係喺心裹面講)，過完農曆年後都未睇過醫生喎，點知小弟就由三月中開始一直反反覆覆咁傷風同埋感冒，前兩日仲又柯又嘔，不過可能終於都將D細菌柯晒出嚟，今日終於都有返D精神同埋開始有胃口食嘢。大家再等多陣喇，我好快就會再更新個部落格架喇。

2009年2月23日，因為尋日玩得太攰，所以今日瞓到成九點先起身，三個人食完早餐後就喺酒店入面週圍行吓同埋影吓相。

蓁蓁話個波波好靚，所以要拎埋出去行街街喎！

週圍都係D好靚嘅花花呀……

指定拍照位置 - 酒店正門

返到入酒店見到幾個好靚嘅公主呀，不過老實講我真係唔知佢地叫乜名，有冇人幫到我呢？

收拾好行裝後，我地又向廸士尼進發。 入到去間舖頭度，突然話有遊戲玩，最後仲贏埋添，不過D禮物就…哈哈

行過見到米奇金獎音樂劇就嚟開場，於是飯都唔食都去睇埋先，不過真係幾精采，連蓁蓁都拍晒手，極之開心！

今日的午餐…

跟著就去咗玩"灰姑娘旋轉木馬"

同埋"小熊維尼歷險之旅"

最後又去Shopping…

然後就滿載而歸咁返屋企喇！

我們的戰利品……

特別鳴謝 - 贊助人大姑姐 及 主辨人Rebecca姨姨

2009年2月22日，蓁蓁嘅兩歲生日，諗咗好耐搞D乜好，見阿囡都幾鍾意Mickey，咁就不如去迪士尼住一晚再去埋樂園玩兩日喇！

生日正日準備出發去迪士尼喇，蓁蓁仲話要帶埋Mickey去喎

出發前先去咗荃灣醫肚先

我地終於都去到酒店喇！

間酒店都幾靚架！

檢視完整相簿

檢視完整相簿

間房都好大喎！

檢視完整相簿

安頓好就立刻過去樂園，阿ba啱啱先泊好車，但係阿mi同蓁蓁已經急不及待咁自己行入去先……

好快就行到去樂園揾Mickey喇！

真係可以???

Yeah!!! 第一時間去City Hall攞個生日襟章先，阿囡要咗個Chip chip Dale Dale喎！

跟著梗係要去同Mickey & Minnie影張相喇，阿囡好叻，一D都唔驚喎！

見到Pluto又話要即刻過去，今次仲要攬實添！

等緊睇巡遊之際，有個姐姐送咗個大貼紙俾蓁蓁，真係好靚架！

阿ba，帶副超做乜呀？原來去咗睇米奇幻想曲，睇完阿囡就小睡咗一陣。

瞓醒但又未夠鐘睇煙花，不如去shopping喇！ 阿mi，可吾可以買晒返屋企呀？

Shopping完就返酒店抖一抖然後去食晚飯，返到入房居然有驚喜喎，原來廸士尼送咗張生日咭同埋一個毛巾蛋糕俾阿囡呀！

自拍全家幅，有冇發覺阿囡個襟章唔同咗樣呢？

生日原來真係好多"人"錫架……

生日點會冇生日蛋糕喎，仲有Pluto同蓁蓁一齊唱生日歌同吹蠟燭，希望阿囡會開心喇！

檢視完整相簿

呢D係阿ba今晚食過嘅野…… 其實唔止咁少，過實在太忙，唔係樣樣記得影相，嘻嘻

檢視完整相簿

最後食到十點幾就同Mickey, Minnie, Goofy & Pluto講拜拜，返上房沖涼瞓覺豬，蓁蓁今日都玩到好攰喇！

明天待續……

話咁快，真係話咁快就兩年，今日係蓁蓁兩歲嘅生日，在此一定要同阿囡講一聲生日快樂，順便係度同蓁蓁嘅堂家姐補祝一句Happy Birthday！(其實佢地兩姊妹嘅生日只差一日)

蓁蓁今年嘅生日我地都係冇同佢搞生日party，只係會今日同佢出去玩吓，去邊度玩？繼續留意我個部落喇！

體重：13.8Kg (30.36磅)  終於都過三十磅喇！

身高：90cm  今個月又高咗1cm呀！

*在此特別多謝Pauline姐姐送嘅Mickey公仔，係蓁蓁今年收嘅第一份禮物，蓁蓁非常鍾意，些些Pauline姐姐！

今日係牛年嘅初五，又係張初五生日嘅大日子，因為係新年關係，順理成章就攪個小型生日會加拜年嘅活動，出席嘅親友包括爺爺嫲嫲、婆婆一家人同細姨丈嘅爸爸媽媽，一圍枱啱啱好夠坐，真係多謝大家咁俾面。

而喺食飯前我地一家三口仲去咗鰂魚涌公園玩咗一陣，順便參觀吓隻退咗役嘅消防船葛量洪號。呢隻船以前真係好勁，曾經參與過好多大型海上救火行動，而好多次係連阿ba都未出世架，大家有時間都可以去行吓，免費入場。 http://www.lcsd.gov.hk/CE/Museum/History/b5/fbag.php

阿ba，乜我今日兩歲咩？

YEAH~~~ 又有街街去…

去公園玩之際，蓁蓁見到好多狗狗，超開心，而呢隻小狗亦十分可愛！

倆母女指尖對指尖，唔知有乜嘢嘅呢？(認唔認得個背景就係我屋企喇，哈哈！)

蓁蓁同阿mi咁留心睇咩呢？

係咪有D少女feel呢？

呢隻就係葛量洪號滅火輪喇！

哈哈，好似參加咗旅行團咁，影埋D咁嘅相……

你地睇吓啦，話佢地唔係倆母女都冇人信，連眼神都咁一致！

好難得阿囡肯同我影張相呀！

你睇轉個頭就走都走唔切……

各位親友，Cheerssssss…

爺爺和嫲嫲

靚婆婆

細姨與姐姐

今日已經正式踏入牛年，在此祝各blog友牛年進步，身體健康。真係話咁快就到，啱啱先過完聖誕節，咁快又話過年，所以都冇乜時間準備，只可以準備咗最基本嗰幾樣。嚟緊幾日行程都好緊密，所以都要早D瞓，預備出去四出拜年。

蓁蓁喺度同各位拜個早年先，恭喜…財！  (教極都係講少個字，激氣！)

話咁快蓁蓁已經二十三個月大，即係仲有一個月就兩歲，要開始諗諗有乜搞作。阿囡真係大個咗好多，每日見到佢開開心心我就開心，希望佢每日都可以係"Happy Girl"喇！

體重：13.6Kg (29.92磅)  同上個月一樣！

身高：89cm  今個月高咗2cm呀！

今日阿ba中午就放工返屋企，做乜東東呢？ 一返到屋企又捉埋蓁蓁出街，都唔知去邊……

阿ba，咁急去邊呀？

你好快D講喎！

嘩！仲要坐車車？唔通阿ba車我去賣？等我諗下先…

原來要去花墟買花花俾阿mi……  阿ba，就買呢朿啦，幾靚架！

嘩！我都幾有眼光喎…

好喇，夠鐘出發啦，等我帶埋態bear bear去同阿mi賀壽先

哈哈，你估我地去咗邊？就係阿mi公司，俾個驚喜佢啦…

阿mi，你鍾唔鍾意D花花呢？蓁蓁都有份選擇架！

阿mi今日嘅生日大餐……

檢視完整相簿

阿mi，等我請你食生日餅乾喇！

Mimi，你今日開唔開心呀？

最後整張全家福先……  Bear bear都係一家人嚟架

返到屋企，蓁蓁仲話要幫手攞花花添。

生日，點會冇生日cake架，不過說時遲，那時快，蓁蓁就幫阿mi吹熄咗，唔知阿mi許咗願未呢？

檢視完整相簿

等阿ba都講番句 "mimi，Happy Birthday"!" 喇

蓁蓁非常心急，第一時間就咬咗落去……

最後，希望佢倆母女每日都係咁開心快樂喇。